هذي قصـه واقعيـه حدثت لـي ( شخصياً ) قبل 11 سنـه
يوم كان عمري 9 سنوات وأدرس في الصف الثالث الإبتدائي ..
تخيلوا معي القصـه قبل 11 سنـه أوكـ ..
وراح اغير أسمائنا الحقيقه ..
أبطـال القصـه
أنـا ( عشوقـه/عسل ) / وسبق التعريف عن نفسي فوق ..
خالتـي ساره / عمرهـا 10 سنوات في الصف الرابع الابتدائي وكنا ندرس في نفس المدرسـه .
خالتي نوال / مدرسه في مدرسة اهليه .. تمهيدي .. ومتزوجـه ومالها الا 4 شهور تقريبا وهي متزوجـه .
خالتي عبيـر / متزوجـه ومامعهـا الا ( بنت & ولد ) .
أمي / متزوجـه اكيد وعندها ( بنت اللي هي انا وولديـن ) .
خالي فهـد / في ثاني متوسط على ما اعتقد وعمره 14 سنـه .
خالي متعب / خلص المتوسطـه ودرس بمعهد ميكانيكا (الجميح ) وعمره 17.
خالي سعد / مسافر مع عيالته لـ سوريـا وقبل لا يسافر اعطى مفاتيح بيته لجدي وعنده ( بنت + ولد ).
جدتي & جدتـي =>> من أمــي
ترتيب أخوالي من الاكبر للأصغر كذا :-
أمــي -> سعد -> عبيـر -> نوال
-> متعب -> فهد -> ساره -> انـا
أدري تقولون وش دخلني بس انا اختهم من الرضــاع
/
\
/
\
تبدأ القصـه بذاك اليوم اللي قرروا فيـه خالاتي وامي أنهم يجتمعون في بيت جدتي كالعاده
أجتمعنا كلنا ماعدا خالي سعد لأنه مسافر لسوريا وخالتي نوال اللي تاخرت علينا كثير
مضى الوقت بسرعـه إليـن جات الساعه 12 آخر الليل
وخالتي نوال ماجات للحيـن ولا اتصلت علينا ولا عطتنا خبر عن سبب تاخرهـا
هنا استأذت امي من جدتي ان ابوي بيجي ياخذها لبيتنا لأن الوقت مره تاخر
وانا جلست اترجى أمي اني ابي انــام عند جدتي مع خالتي ساره عشان بكره نروح للمدرسه مع بعض
بعد إلحاح مني ومن جدتي عشان انام عندها وافقت امي ولله الحمد
طلعنا انا وخالتي ساره فوق لغرفة خالتي نوال سابقاً قبل ماتعرس عشان ننام فيها
وأول ماحطينا روسنا على الوساده رحنا في سابع نومـه [ zzzzzzz ]
على الساعه ( 1 أو 1:30 ص ) جات خالتي نوال لبيت جدتي وحزتها كان الكل نايم
ماعدا خالتي عبير ماجاها النوم وهذا من حظ خالتي نوال
لأن خالتي عبير هي اللي فتحت باب الشارع لها ,, بعدها سكروا الباب القسامي للدور الارضي
وطلعن لفوق وجلسوا في صالة الدور العلوي
وجلست خالتي نوال تشتكي لأختها عبير عن سبب تاخرهـا وخالتي عبير جالسه تهدي خالتي نوال بشتى الطرق
لأن سبب تأخر خالتي نوال هو أن رجلهـا "زوجها" رمى عليها اليمين وطلقها
عن جد كان سبب قوي وطبيعي ان النوم يجافيها في هاليوم
بعدها خالتي نوال صارت تشم ريحه غريبه ..؟!
خالتي نوال : عبير ماتشميـن اللي قاعده انا اشمه ..؟!
خالتي عبير : لا والله ماشميـت ,, وش تشميـن بالضبط ؟
خالتي نوال : يختي أشم ريحة شيء يحترق
خالتي عبير : وشو ..؟! أقول لا تخوفيني
خالتي نوال : أقول قومي معي خلينا نفتش الغرف اخاف فيه إلتماس كهرب
بعدها راحوا خالاتي لغرفة خالتي نوال سابقاً اللي انا وخالتي ساره نايميين فيها
وفتحوا البابا وتفاجؤا
خالتي نوال : من وين هالدخان جالس يطلع ؟
خالتي عبير : مدري والله ,, بس الظاهر أنه المكيف ملتمس خلينا نطفيه ونطلع البنات لغرفة اخواني لا ينكتمون
خالتي عبير : يلـه بسرعـه
تفاجات أنا باللي سكرت المكيف وفتحت الشباك وجالسه تقومنـي
خالتي نوال : عسل عسل يله قومي نومي في غرفة خوالك
انا : ليــه ؟
خالتي نوال : المكيف خربان واحترق
أنا : طيب خلاص بقوم الحيـن
قمت ورحت لغرفة خوالي بكل كسل والا خالتي عبير جالسه تسحب خالتي ساره لانها ماصحت نومها ثقيل
فرشوا لنا مرقد على الارض ونمنا عليــه
بعدها طلعن خالاتي للصاله يكملون سوالفهم وفجأة قبل صلاة الفجر تقريبا بربع او عشر دقايق
خالتي نوال : يختي للحيـن أشم الريحـه وشكلها زادت
خالتي عبير : أقول بس لا توسوسيـن علينا
خالتي نوال : وش اوسوس انتي بعد ,, اسمعي انا بنزل للدور الارضي اشيك على الغرف اللي هناك وانتي شيكي على غرف الدور الثاني والسطح
خالتي عبير : طيب ,, يلـه
راحت خالتي عبير تشيك على غرف الدور الثاني ونزلت خالتي نوال لتحت
وأول مافتحت الباب القسامي اللي يفصل درج الدور العلوي عن الارضي انكب بوجهها سحابة دخااان سووداا
مره كثيفـه ,,هنا انهبلت خالتي نوال واكتشفت ان المخزن التحتي جالس يحترق ..!
طلعت بسرعه للدور الفوقي وهي تصرخ وتقول : عبير عبييير الحقي علينا حريقه حريقه
خالتي عبير : وشو انتي تمزحين ولا تتكلمين جد
خالتي نوال : والله ما اكذب المخزن اللي تحت جالس يشب ضو بسرعه قومي اهلي خلهم يطلعون من البيت قبل لا تكبر الحريقه
خالتي عبير راحت ركض لغرفة جدي وجدتي وصارت تخبط بكل الانوار عشان تشغلها وقالت : يمه يبا قوموا شبت ببيتنا حريقه ..!
جدتي وجدتي من روعة الانوار الصفراء اللي اشتغلت صحوا
وخافوا أكثر لما سمعوا هالجمله من خالتي عبير " شبت ببيتنا حريقه "
جدي نزل من السرير من جهة اليسار وجدتي نزلت من السرير من جهة اليمين واثنينهم بنفس الوقت راحوا لوسط السرير وتصادموا من زود الربشه والخوف اللي فيهم
جدي أخذ "ليي مويـه" ونزل به تحت وشبكه ببزبوز المويه في الحمام وانتوا بكرامه ودخل المخزن اللي جالس يحترق ويرش عليه مويـه عشان يخفف من النار
جدتي لبست عبايتها ونزلت تحت وراحت للتليفون عشان تتصل بالمطافي
لكنها تحطمت لما سمعت بسماعة الهاتف شخص يقول : عدم تسديدك للفاتوره أدى لفصل الخدمه عن هاتف
وراحت على طول لجدي عشان تطلعه من المخزن لا ينكتم
وفي هاللحظه نزل خالي متعب بسرعه وركب سيارته وراح طيران للمطافي
وخالاتي صحوا اللي بالطابق العلوي كله من ضمنهم خالي فهد والخدامه
خالي فهد كان مو مستوعب الوضع أخذ مريولي حق المدرسه وتلطم فيه وطلع للشارع
وخالتي عبير خذت جلال غطت به نفسها وطلعت للشارع
وخالتي نوال خذت لها شيء تستر به نفسها وطلعت للشارع
وانا وخالتي ساره طلعنا للشارع وجلسنا نركض فيه حوالي عشرين خطوه إلين وصلنا لجارتنا السوريه
ام محمد ,, رنينا عليها الجرس وجلسنا نضرب الباب وفي هالوقت كان توه مأذن الفجر
فتحت لنا ام محمد باب الشارع وهي خايفه : ميــــن ؟ مين عند الباب
أنا وساره : حنــا
أم محمد : شو بكون ؟ شو مصحيكون ؟
أنا وساره : ألحقي علينا شبت ببيتنا حريقه
أم محمد : شو؟ عم بتكذبوا
انا وساره والدموع متجمعه بعيونا من الخوف : والله مانكذب
ثم نزلت ام محمد من الدرج الين وصلت لباب الشارع وطلعت براسها وفعلاً شافت بيت جدتي يطلع من دخان أسود مخييف واهلي كلهم برا
ام محمد : أوليي على آمتي بعتلي الحمى
وراحت تركض لفوق واتصلت على المطافي
بعدها انا وخالاتي "ساره+نوال+عبير" وجدتي والخدامه رحنا وجلسنا في بيت جارتنا ام محمد
صدق من قال ان الجار للجار لولا الله ثم هي ماندري وش كنا بنسوي
وتركنا جدي وخالي فهد ينتظرون المطافي
انا جالسه ابكي واقول : شنطتي تهئ تهئ شنطتي حقت المدرسه بتحترق << كلن على همه سرى انكخخخخخخ
خالتي ساره : وين تحترق معه انتي وينك حاطتها فيه ؟
أنا : حاطتها فوق بالصاله
خالتي ساره : هههههههههه احمدي ربك احسن مني انا حاطتها بالصاله اللي تحت وماصحت مثلك
بعدين احسن ياغبيه عشان معد نروح للمدرسه << بزران ماعليهم شرهه انكخخخخخخ
بعد ربع ساعه وصلت سيارتيـن مطافي وحده من خالي متعب ووحده من ام محمد وماشغلوا صافرة الانذار لانهم مايبون يزعجون الناس على هالفجريـه
بفضل الله اولاً ثم بفضلهم قدروا يطفون النار واكتشفوا أن سبب الحريقه هو ألتماس في كهرب الفريزر
والناس طالعه من المسجد وخايفه علينا بس الحمد لله تطمنوا علينا لانه مافيه أي اصابات
وجميـع الاغراض الغذائيه والادوات الكهربائيه اللي كانت موجوده في المخزن عليها السلام "احترقت"
وكتبوا المطافي لنا تعوييض عن الخساير وبيني وبينكم عمري الحين 21 سنه وماشفنا هالتعويض هع هع
بعدها رجعنا كلنا للبيت وجلسنا بالمجلس كانت جدرانه لونها رصاصي من الدخان
بالمعنى الصحيح الدور الارضي كله اسود والدور العلوي اشهب
يعني يبي لنا نضرب البيت بويـه " صبغه " من جديد
جلسنا نسولف ونسترجع الاحداث ونتحمد على سلامة بعضنا الا ويدخل خالي متعب وهو معصب وفي يده قفص بلابل ميته
ماتت من الدخان ماتت مكتومـه ,, انا يوم شفتها جلست اصيح كنت احبها
ومن ذاك اليوم حلف خالتي متعب يمين ان ولا عصفور يدخل لبيتهم وهو موجود فيه
بعدها رحنا للمدرسه انا وخالتي واشكالنا كانت شبهه شعورنا منفوشه خخخخخ واشكالنا مغبره وريحتنا حريق
والبنات ما قروا من الاسئله : سلامات .. وش منه الحريق .. ماتشوفون شر .. ليه مداومين اليوم << ردود متفرقه
موضوع: بسم الله الرحمن الرحيم السلام عليكم ورحمة الله وبركاتهـ ×. عندمـا أشتعلـت النـار في بيتنا .× 
